მოქალაქეობის არმქონეობის შემცირებისა და ამგვარი შემთხვევების თავიდან არიდების საკითხებზე „UNHCR“ იუსტიციის სამინისტროში პროექტს 2010 წლიდან ახორციელებს. 2012 წლიდან დღემდე მოქალაქეობის არმქონე პირთა რიცხვი განახევრდა (იყო 1156 და დღეს 558-ია). საქართველოს მიერ ამ სფეროში მიღწეული პროგრესის გათვალისწინებით წელს საერთაშორისო ორგანიზაციამ მიიღო გადაწყვეტილება ფორმატის შეცვლის თაობაზე − თანამშრომლობა გაგრძელდება არა საპროექტო ხელშეკრულების, არამედ მემორანდუმის ფარგლებში, რომელიც ორმხრივ ინიციატივებზე იქნება დაფუძნებული.

კერძოდ, ურთიერთთანამშრომლობის დოკუმენტის თანახმად,

• გაერო-ს ლტოლვილთა უმაღლესი კომისარიატი საექსპერტო და ტექნიკურ დახმარებას გაუწევს საქართველოს დევნილთა, მოქალაქეობის არმქონე პირთა და ლტოლვილთათვის პირადობის დამადასტურებელი დოკუმენტების გაცემის საერთაშორისო პრაქტიკის გაზიარებაში;
• მხარეები ითანამშრომლებენ ქვეყანაში მოქალაქეობის არმქონეობის შემთხვევების შემცირებისა და თავიდან ასარიდებლად;
• შეაფასებენ მოქალაქეობის არმქონეობის, პირთა ნატურალიზაციისა და დოკუმენტირების სფეროებში არსებულ საჭიროებებს და უზრუნველყოფენ ცალკეული ღონისძიების განხორციელებას;
• დაგეგმავენ და განახორციელებენ კამპანიას მოქალაქეობის არმქონეობის პრობლემის შესახებ საზოგადოების ცნობიერების ამაღლების მიზნით.
მემორანდუმი უვადოა და ის ხელმოწერისთანავე ამოქმედდება.